ಬಾರಯ್ಯ ನನ್ನೂರಿಗೆ

ನಾನು ಹಿಂದೆ ಬರೆದಿದ್ದ ಬಾರಯ್ಯ ನನ್ನೂರಿಗೆ ಕವನವನ್ನು ಕೆಳಗೆ ಕೊಟ್ಟಿದ್ದೇನೆ.ಅದರ ಸೌಂದರ್ಯದ ವಿವಿಧ ಮುಖಗಳ ಚಿತ್ರಾವಳಿಯೂ ಇಲ್ಲಿದೆ.ಶಬ್ದ ಚಿತ್ರ ಮತ್ತು ದೃಶ್ಯಚಿತ್ರಗಳ ಸಂಗಮ ಇಲ್ಲಿದೆ.ಅನುಭವದ ಮೂಲ ಮತ್ತು ಮತ್ತು ಅಭಿವ್ಯಕ್ತಿಯ ಕೌಶಲವನ್ನು ಕವಿಗಳು ಮತ್ತು ಕವಿಮನಸ್ಸಿಗೆ ಲಗ್ಗೆ ಹಾಕಬಲ್ಲ ಸಹೃದಯರು ಇಲ್ಲಿ ಅನುಸಂಧಾನ ಮಾಡಿಕೊಳ್ಳಬಹುದಾಗಿದೆ.
ಯಾರಯ್ಯ ನೀನು ದಾರಿಲಿ ಹೋಗುವವ!
ಬಾರಯ್ಯ ನನ್ನೂರಿಗೆ

ನನ್ನೂರ ಕೆರೆಯು ತುಂಬಿ ತುಳುಕುವುದು
ತೆಂಗಿನ ಸಾಲು ತೇಪಾಡುವುದು:
ಕಣಿವೆಯ ದಾರಿಯ ಕಿರುದಾರಿಯ ಹಿಡಿದು
ಬಾರಯ್ಯ ನನ್ನೂರಿಗೆ.

ಸುತ್ತಮುತ್ತಲು ಕೋಟೆ ದುಪ್ಪಟಿ ಸುತ್ತಿದೆ ಮೋಡ
ಬೆಚ್ಚಗೆ ಮಲಗಿದೆ ಕೂಟಗಲ್ಲು
ಕಣ್ವೆಯ ಕಣ್ಣಿನ ಮಿಂಚಿನೆಳೆಯ ಹಿಡಿದು
ಬಾರಯ್ಯ ನನ್ನೂರಿಗೆ

ಅಗೆದರೆ ಕಾರಂಜಿ ನೆಲವೆಲ್ಲ ಅಪರಂಜಿ
ಮೈಯೆಲ್ಲ ಹಸುರಂಗಿ ನನ್ನೂರಿಗೆ
ಸ್ವಾಮಿ ತಿಮ್ಮಪ್ಪನ ಸನ್ನಿಧಿ ಬಳಿ ಇರುವ
ಗಳಗ್ಗಲ್ಲ ಮೋಡಿ ನೋಡಿ
ಬಾರಯ್ಯ ನನ್ನೂರಿಗೆ.